இடை இடையே

வடையோடு சாதம் பச்சடி கூட்டு தயிர் என்றும்
சீடை தொடங்கி கடலை முறுக்கு வரை
தடை ஏதுமில்லாமல் வயிறார உண்டதன் விளைவு
எடைகூடி எக்கச்சக்கமாய் உருவமும்
இடையில்லாமல் உருமாறிப்போன வேளைதன்னில்
கோடை வெய்யிலின் அனல் அகோரமாய் தாக்க
ஓடை தேடி ஓட்டமாய் ஓடினேன்

மடை திறந்த வெள்ளமாய் பாயும் ஆற்றுநீரும்
வாடைக்காற்றின் இதமான கட்டித் தழுவலும் ஆஹா
அடைந்தேன் இன்பம் அனைத்தும் கடவுள் தந்த
கொடை என்றே சுகம் அனுபவித்த வேளையில்
கூடையிலே பூச்சரமோ என்று எண்ணுமளவுக்கு
சடையிலே மல்லிகைச்சரம் பின்னிப்பிணைய
உடையிலே ஊதாநிற சல்வார்கமிஸ் மின்ன
தாடை மீது  மச்சத்துடன் கொடி
இடை அவளின் மென்மை அழகும்
நடையிலே தங்கப் பதுமையுடன் கதைபேசும்
கடைக்கண் பார்வையாலே அன்புடன்
இடைக்கிடை என்னை நோக்கி முறுவலித்தாள்

இடையிடையே இருவிழி நோக்கி பார்த்ததால் நானும்
பாடையில போகும் முன் முனைப்போடு
எடை குறைக்க உடைப்பயிற்சி நிலையம் சென்று
வல்லினத்தில் இனிக்கும் மெல்லினமாய்
மெல்லினத்தில் இணையும் வல்லினமாய் வாழுமிந்த
இடையினத்துப் பைங்கிளியை நினைந்து நினைந்து
இடையிடையே என் மனம் புலம்புது இங்கே